पहिलो चरणमा कोरोना विरुद्धको कोभिशिल्ड खोप लगाएका झन्डै १३ लाख व्यक्तिले दोस्रो चरणको खोप पाएका छैनन् । पहिलो चरणको खोप लगाएको ४ महिना बितिसक्दा पनि दोस्रो चरणको खोप नपाएको खोप शाखाले जानकारी दिएको छ ।
नेपाल सरकारले गत फागुनमा ६५ वर्ष माथिका वृद्धवृद्धालाई खोप उपलब्ध गराएको थियो । पहिलो चरणको खोप लगाएपछि दोस्रो चरणको खोप ४ सातापछि लगाउने भनिएको थियो । तर १६ साताभन्दा बढी बितिसक्दा पनि खोपको अत्तोपत्तो छैन ।
पहिलो चरणमा लगाइएको कोभिसिल्ड भारतबाट आएको थियो । भारतले पछि थप खोप पठाउन नसक्ने भनेपछि खोपको अभाव भएको हो । ४ महिना बितिसक्दा पनि खोपको दोस्रो चरण लगाउन नपाउँदा पहिले लगाएको खोपले कत्तिको प्रभावकारी रूपमा काम गर्छ भन्ने कुरा यकिन गर्न सकिएको छैन ।
कोभिशिल्ड बेलायतको अक्सफोर्ड विश्वविद्यालय र एस्ट्राजेनिकाले बनाएको हो ।
नेपालमा भने भारतको सेरम इन्स्टिच्युटबाट बनेको खोप आयात गरिएको थियो । भारतले सुरुमा १० लाख डोज खोप अनुदान स्वरूप पठाएको थियो । पछि नेपालले दोस्रो चरणको खोप दिनको लागि २० लाख खोप सम्झौता गरेको हो । तर भारतले खोप उपलब्ध गराउन नसक्ने भनेपछि दोस्रो चरणको खोपका लागि ढिलाइ भएको हो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।