प्रमुख प्रतिपक्षी दल नेकपा एमालेका वरिष्ठ नेता माधव कुमार नेपाल समूहको केन्द्रीय समिति बैठक जारी छ । काठमाडौंको बानेश्वरस्थित एक पार्टी प्यालेसमा जारी बैठकमा केन्द्रीय सदस्यहरुले आफ्नो धारणा राखिरहेका छन् । 

पार्टी विभाजन गरेर अघि बढ्ने अथवा एमाले एकताको पक्षमा रहेर अध्यक्ष केपी शर्मा ओलीसँग सम्झौता गरेर अगाडि बढ्ने भन्ने विषयमा साझा धारणा बनाउनका लागि नेपाल समूहको बैठक बसिरहेको हो । 

बैठकमा नेपाल पक्षका एमालेका ७० जना केन्द्रीय सदस्य उपस्थित रहेका छन् । तर, स्थायी समिति सदस्यहरु सुरेन्द्रप्रसाद पाण्डे र योगेश भट्टराई भने बैठकमा अनुपस्थित रहेका छन् । 

तोकिएको भन्दा ४ घण्टा ढिला सुरु भएको बैठकमा पाण्डे र भट्टराई दुवै अनुपस्थित रहेका हुन् । यसअघि बसेको नेपाल पक्षको स्थायी समिति बैठकमा पनि दुवै अनुपस्थित रहेका थिए । 

पाण्डे र भट्टराई दुवैजना कोरोना संक्रमितको ट्रेसिङमा परेकाले बैठकमा अनुपस्थित रहेका बताइएको छ ।