जर्मन बुन्डेस लिगा अन्तर्गत शनिबार राति भएको खेलमा बायर्न म्युनिखले हेर्था बर्लिनमाथि ५–० को फराकिलो जित दर्ता गरेको छ ।

घरेलु मैदान एलियान्ज एरिनामा बार्यनलाई सहज जित दिलाउन रोबर्ट लेवान्डोस्कीले ह्याट्रिक पूरा गर्दा थोमस मुलर र जमल मुसिआलाले १–१ गोल गरे ।

खेलको छैटौँ मिनेटमै मुलरले गोल गर्दै बायर्नलाई अग्रता दिलाए । २४औँ मिनेटमा लेवान्डोस्कीले टोलीको अग्रता दोब्बर बनाए ।

पहिलो हाफमा दुई गोल गरेका वायर्नले दोस्रो हाफमा ३ गोल थप्यो । ४९औँ मुसिआलाले टोलीका लागि तेस्रो गोल गरे ।

७० र ८४ औँ मिनेटमा लेवान्डोस्कीले गोल गर्दै ह्याट्रिक पूरा गरेपछि बायर्नले सहज जित दर्ता गरेको हो ।

जितसँगै ३ खेलबाट ७ अंक जोडेको बायर्न दोस्रो स्थानमा रहँदा लगातार तेस्रो पराजय बेहोर्दै अंक विहीन बनेको हेर्था अन्तिम स्थनमा छ । 

लिग अन्तर्गत शनिबार राति नै भएका अन्य खेलमा फ्रेइबर्गले स्टुटगार्टमाथि ३–२, माइन्जले गे्रयुटर फ्रुर्थमाथि ३–०, बायर लिभरकुसेनले अग्स्बर्गमाथि ४–१ को जित हात पारे ।

कोलोग्नेले बोचुमलाई २–१ ले हराउँदा अर्मिनिया बेइलफिल्ड र फान्कफुर्टले १–१ बराबरी खेले ।