नेकपा एमाले परित्याग गरी नेकपा एकीकृत समाजवादीतर्फ लागेका प्रदेशसभा सदस्यहरूले आज निर्वाचन कार्यालय पुगेर सनाखत गरेका छन् ।
तत्कालीन एमालेका ११ जना सांसदले आज नेकपा एकीकृत समाजवादीमा सनाखत गरेका हुन् ।
१३ मध्ये २ जना सांसद काठमाण्डौमा रहेकोले आज ११ जनाले सनाखत गरेको प्रदेशसभा सदस्य शत्रुधन महतोले जानकारी दिए । उनले बाँकी २ जना सांसदले अर्को दिन सनाखत गर्ने बताए ।
प्रदेश २ सभामा एमालेका २१ जना प्रदेशसभा सदस्य छन् । एमाले विभाजित हुँदा प्रदेशसभामा नेकपा एकीकृत समाजवादी मजबुत स्थितिमा छ । २१ मध्ये माधव पक्षमा १३ जना प्रदेशसभा सदस्य छन् । बाँकी ८ जना भने ओलीको पक्षमा छन् ।
आज सनाखत गर्नेहरूमा प्रदेशसभा सदस्य अशोककुमार यादव, गोविन्दबहादुर न्यौपाने, डिल्लीप्रसाद उप्रेती, नागेन्द्र राय यादव, प्रमोदकुमार यादव, मदनसेन श्रीवास्तव, मञ्जु यादव, रवीन्द्र बैठा, बेची लुंगेली, शत्रुधन महतो र हसिमा खातनु रहेका छन् ।
प्रदेशसभा सदस्य सीता गुरुङ र सुन्दरबहादुर विश्वकर्माले सम्भव भएसम्म आजै नभए अर्को दिन सनाखत गर्ने बताइएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
