प्रमुख प्रतिपक्षी दल नेकपा एमालेले सभामुख अग्निप्रसाद सापकोटाको भूमिकाप्रति गम्भीर प्रश्न उठाएको छ ।
प्रतिनिधिसभाको नवौं अधिवेशनको आज सुरु भएको पहिलो बैठकको सुरुमै विरोध गर्दै सभामुखको भूमिकाप्रति एमालेले प्रश्न उठाएको हो । एमाले सचेतक समेत रहेका सांसद विशाल भट्टराईले बैठकको सुरुमा बोल्दै ‘तपाईंले हामीले कारबाही गरेका सांसदहरुको हकमा किन सुचना निकाल्नुभएन ?’ भन्दै प्रश्न गरेका छन् ।
बैठक सुरु हुनेबित्तिकै अवरोध सुरु भएपछि सभामुख सापकोटाले भट्टराईलाई बोल्न समय दिएका थिए । ‘नेकपा एमाले अन्य कुनै धर्तीबाट आएको पार्टी त होइन होला ? तपाईंले हामीले कारबाही गरेका सांसदहरुको हकमा किन सुचना निकाल्नुभएन ? १३ दिनपछि हाम्रो पार्टी टुक्र्याइसकेपछि सभामुखज्यूले केही गर्न नपर्ने भन्नुभएको छ,’ उक्त समयमा बोल्दै भट्टरार्ईले भने, ‘सभामुख महोदय तपाईंले नेकपा एमालेले कारबाही गरेका सांसदहरुको हकमा उनीहरुलाई बचाउन र नेकपा एमाले टुक्रयाउन किन सहयोगी बन्नुभयो ? दल विभाजनका लागि किन मतियार हुनुभयो ? किन सारथिको भूमिका खेल्नुभयो ? यो प्रश्न सम्मानित संसद समक्ष जोडदार उठाउन चाहन्छौं ।’
यसको यथोचित जवाफ नपाउन्जेल आफूहरुले संसद चल्न नदिने चेतावनी समेत उनले दिए । ‘एमालेजस्तो लोकतन्त्रको लागि ७२ वर्ष संघर्ष गरेर आएको यो पार्टीलाई कसैले नियम कानुन विपरित तल पारेर हेप्न खोज्छ भने एमाले चुप लागेर नबस्ने कुरा जानकारी गराउन चाहन्छु । यसको यथोचित जवाफ नपाउन्जेल यो संसद अघि बढ्न नदिने नेकपा एमालेको निर्णय जानकारी गराउन चाहन्छु,’ उनले भनेका छन् ।
प्रमुख प्रतिपक्षी दल नेकपा एमालेले अवरोधका कारण संसद बैठक १५ मिनेटका लागि स्थगित भएको छ । त्यसपछि सभामुख अग्निप्रसाद सापकोटाले जवाफ दिँदैगर्दा एमाले सांसदहरु आफ्नो आसनबाट उठेर विरोध गरेका थिए ।
नेकपा एमालेका सचेतक सांसद विशाल भट्टराईले आज संसदमा जे भनेः
प्रतिनिधिसभाको नवौं अधिवेशनमा मुलुकको सबैभन्दा ठूलो राजनीतिक दल नेकपा एमाले संसदीय दलको तर्फबाट हामी अत्यन्तै भारी मनका साथ उपस्थित भएका छौं । अचानक साउन ३२ गते संसदको अधिवेशनको अन्त्य गरियो । असरल्ल छरिएर रहेका थुप्रै विधेयकहरुमा कुनै चर्चा गरिएन । त्यतिमात्र होइन्, ३ गतेका दिन प्रारम्भ भएको यो बैठकका १५ वटा अध्यादेशमाथि पनि कुनै चर्चा गर्न सरकारले र संसदले आवश्यक ठानेन । यस्तो अवस्थामा संसद अधिवेशन अन्त्य हुने वित्तिकै दल फुटाउनका लागि अध्यादेश ल्याइन्छ कि भनेर धेरै माननीयहरुले भन्नुभएको थियो । अध्यादेश ल्याइन्छ कि हामीले आशंका गरेका थियौं । नभन्दै ३२ गते राति १२ बजे संसदको अधिवेशन अन्त्य हुन्छ र १ गते सबेरै अध्यादेशको चर्चा हुन्छ । भोलिपल्टै राष्ट्रपतिबाट त्यो जारी हुन्छ । अघिल्लो दिन ४ बजेर २० मिनेट जाँदा हामीले सम्माननीय सभामुखको टेबुलमा हामीले पुर्याएका छौं, हाम्रो दलको अनुशासन उल्लघंन गर्ने १४ जना सांसदहरुलाई कारबाही गरिपाँउ भनेर निवेदन गरेका थियौं ।
लोकतान्त्रिक व्यवस्थामा र एउटा दलीय व्यवस्थामा आफ्ना सांसदहरुलाई अनुशासनको दायरा उल्लघंन गरेको किटानी गर्ने अधिकार साँच्चै भन्ने हो भने त्यो दलको केन्द्रीय कमिटीलाई र दललाई दिइएको छ । त्यो राजनीतिक दलसम्बन्धी ऐनले व्यवस्था गरेको छ । हामीले कारबाही गरेको पठाएको त्यो निवेदनको हामीले भोलिपल्ट प्रतिक्षा गर्यौं । सभामुख महोदय हामीले कहीँ सुचना पाइएन । ३ गते फेरि मेरै नेतृत्वमा सभामुख समक्ष गएर आग्रह गर्यौं । यसअघिका नजिर हेर्दा माननीय सरिता गिरीलाई २०७७ सालको असार २४ गतेका दिन १८ घन्टा नपुग्दै सुचना जारी गरेर निष्कासन गर्नुभएको छ । २०७७ साल चैत्र २४ तत्कालिन माओवादी केन्द्रको निष्कासन गरेको पत्र २४ घन्टा नबित्दै पढेर सुनाउनुभएको छ । त्यो नियम माओवादी केन्द्रबाट निष्कासित सांसद र जनता समाजवादी पार्टीका सांसदहरुलाई मात्र लागु हुन्छ कि नेकपा एमालेको हकमा पनि लागु हुन्छ । सम्माननीय सभामुखको त्यो आसनमा बसिरहँदा सबै दलहरूप्रति सम्मानपूर्वक समानतापूर्ण व्यवहार हो कि होइन् ।
नेकपा एमाले अन्य कुनै धर्तीबाट आएको पार्टी त होइन होला ? तपाईंले हामीले कारबाही गरेका सांसदहरुको हकमा किन सुचना निकाल्नुभएन ? १३ दिनपछि हाम्रो पार्टी टुक्र्याइसकेपछि सभामुखज्यूले केही गर्न नपर्ने भन्नुभएको छ । सभामुख महोदय तपाईंले नेकपा एमालेले कारबाही गरेका आफ्ना कारबाही गरेका आफ्ना सांसदहरुको हकमा उनीहरुलाई बचाउन र नेकपा एमाले टुक्र्याउन किन सहयोगी बन्नुभयो ? दल विभाजनका लागि किन मतियार हुनुभयो ? किन सारथिको भूमिका खेल्नुभयो ? यो प्रश्न सम्मानित संसद समक्ष जोडदार उठाउन चाहन्छौं ।
निर्वाचन आयोगसमक्ष हाम्रो पार्टीका १० जना केन्द्रीय कमिटीका सदस्यहरुलाई कारबाही गरेको पत्र समयमै बुझाएका थियौं । दल विभाजनका लागि दिइएको सुरुको निवेदनमा हुँदै नभएका ६ जना सांसद र हामीले कारबाही गरेका १० जना गरेर १६ जना सांसदहरुको सनाखत गरेर आयोगले हतार हतार फुटाउने दुस्साहस गरेको छ । संविधान, नीति, विधि विधान मिचेर पार्टी फुटाउन जे जस्ता कामहरु भए यो संवैधानिक रुपमा पनि प्रश्न उठेको छ, अदालतमा पनि पुगेको छ । यसको समयक्रममा जवाफ पाइला । तर हामीले यहाँबाट यसको जवाफ खोजिरहेका छौं । सभामुखको आसनबाट हामीले यो जवाफ खोजिरहेका छौं । निर्वाचन आयोगबाट हामीले जवाफ खोजिरहेका छौं । एमालेजस्तो लोकतन्त्रको लागि ७२ वर्ष संघर्ष गरेर आएको यो पार्टीलाई कसैले नियम कानुन विपरित तल पारेर हेप्न खोज्छ भने एमाले चुप लागेर नबस्ने कुरा जानकारी गराउन चाहन्छु । यसको यथोचित जवाफ नपाउन्जेल यो संसद अघि बढ्न नदिने नेकपा एमालेको निर्णय जानकारी गराउन चाहन्छु धन्यवाद ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।