प्रतिनिधिसभा बैठकमा प्रमुख प्रतिपक्षी दल नेकपा एमालेको अवरोध जारी छ । आज बिहान ११ बजेका लागि बोलाइएको बैठक सुरु हुनासाथ प्रतिपक्षी एमालेले विरोध गर्दै संसद अवरुद्ध गरेको हो । 

सभामुख अग्निप्रसाद सापकोटाको भूमिकाप्रति प्रश्न उठाउँदै एमालेले अवरोध गर्दै आएको छ । प्रतिनिधिसभाको नवौं अधिवेशन सुरुसँगै एमालेले अवरोध जारी राखेको छ । 

आजको बैठकमा एमालेको अवरोधलाई ध्यान नदिई सभामुख सापकोटाले सदनको काम अघि बढाएका छन् । एमालेले संसदमा नाराबाजी गरिरहेको छ ।

कानुन बमोजिम पार्टीले प्रक्रिया पूरा गरेर निष्कासन गरेका सांसदहरुलाई सभामुखले पदमुक्त गरेको सूचना टाँस्नुपर्ने भन्दै एमालेले उनीहरुलाई सांसदको रुपमा संसदमा प्रवेश दिएको विरोधमा सदन अवरोध गरिरहेको छ ।