नेकपा माओवादी केन्द्र निकट विद्यार्थी संगठन अनेरास्ववियू (क्रान्तिकारी)ले इतिहासमै पहिलो पटक महिला अध्यक्ष पाएको छ । ६ जना दाबेदारमध्ये पार्टी अध्यक्ष पुष्पकमल दाहाल ‘प्रचण्ड’ले पञ्चा सिंहलाई अध्यक्षमा चुनेका छन् ।
 
राजधानीमा जारी अखिल क्रान्तिकारीको राष्ट्रिय सम्मेलनले सिंहलाई आजै अध्यक्षको घोषणा गर्दैछ । अध्यक्षमा सुरेन्द्र बस्नेत, पञ्चा सिंह, तिलकराज भण्डारी, दीपक देवकोटा, विजय गौतम, उत्तम अधिकारी र दीपेश पुनको दाबेदारी थियो । 

यी सबैलाई माओवादीका दोस्रो तहका नेताहरूको बलियो साथ थियो । नेताहरूका अनुसार सिंह अर्थमन्त्री समेत रहेका स्थायी कमिटी सदस्य जनार्दन शर्मा निकट मानिन्छिन् । 

नेतृत्व छनौटमा विवाद बढ्दै गएपछि अन्ततः प्रचण्डलाई नै यसको जिम्मेवारी दिइएको थियो । प्रचण्डले सबै नेताहरूलाई खुमलटार बोलाएर एक्लाएक्लै छलफल गरेका थिए । अध्यक्षमा सिंहलाई जिम्मा दिएका प्रचण्डले अरू नेताहरूलाई पार्टी केन्द्रीय सदस्य बनाएर व्यवस्थापन गरिएको बुझिएको छ ।

को हुन् पञ्चा सिंह ? 

१४ वर्षको उमेरदेखि नै माओवादी आन्दोलनमा जोडिएकी पञ्चा १७ औं सम्मेलनबाट अखिलको केन्द्रीय सदस्य बनेकी थिइन् । माओवादीसँग नारायणकाजीको एकता हुँदा उनी सचिवालय सदस्य बनेकी थिइन् ।

कालिकोटको महावैमा जन्मिएकी उनी सुरुमा माओवादीको कलाकार टिममा रहेर काम गरेकी थिइन् । २१ औं राष्ट्रिय सम्मेलनमा जनार्दन शर्मा र वर्षमान पुनको टिम बन्दा सिंह प्रभाकरको टिमबाट चुनाव लडेकी हुन् ।

पहिलो महिला नेतृत्वको दाबी गर्दैगर्दा सिंहको चर्चा ह्वात्तै उठेको थियो । पञ्चाको परिवार नै राजनीतिमा छ । 

माओवादीमा लागेको छोटो समयमा नै उनी २०५९ मा जुम्ला जिल्लाकाे कोषाध्यक्ष भएकी थिइन् ।  २०६२ मा कालिकोट र जुम्लाको क्रान्तिकारी अध्यक्ष बनेकी  उनी २०६५ मा भेरी-कर्णालीको संयोजक बनेकी थिइन् ।