दार्चुला व्यास गाउँपालिका-१ स्थित तिंकर र छाङ्गरुमा जनगणना गर्न गएका गणक फिर्ता भएका छन् । अप्ठ्यारो बाटोका कारण हिँड्न नसकेर गणक दुम्लिङबाट सदरमुकाम खलंगा फर्किएका हुन् ।
दुम्लिङ अगाडि बाटो छैन । दार्चुला जनगणना कार्यालयका प्रमुख पदमराज पाण्डेकाअनुसार दुम्लिङबाट छाङ्गरु पुग्दासम्म बीचमा बाटो पसल केही पनि छैन । बाटो चलन चल्तीमा नहुँदा एकदमै कठिन छ ।
दार्चलाकाे सदरमुकाम खलंगाबाट तिंकर र छाङ्गरु जान स्थानीयहरू भारतीय बाटो प्रयोग गर्दै आएका छन् । भारतले जनगणनाको टोलीलाई भने जान अनुमति नदिँदा आफ्नो देशको अप्ठ्यारो बाटो प्रयोग गर्न बाध्य भएका हुन् ।
खलंगाबाट शुक्रबार बिहान ३ सदस्यीय गणकको टोली नेपाली बाटो भएर छाङ्गरु र तिंकरतर्फ गएको थियो । टोलीमा रहेका गणक राजेन्द्र कार्की हिँड्न नसकेपछि फर्किएको जनगणना कार्यालय दार्चुलाका पाण्डेले बताए ।
टोलीमा जनगणना कार्यालय दार्चुलाका सहायक जनगणना अधिकृत खगेन्द्र कार्की, गणक राजेन्द्र कार्की र एक जना कार्यालय सहयोगी छाङरु र तिंकरका लागि गएका थिए ।
गणक हिँड्न नसकेर फर्किएपछि सहायक जनगणना अधिकृत, कार्यालय सहयोगीमात्रै त्यसतर्फ लागेका छन् ।
खलंगाबाट करिब ३ दिन जोखिमपूर्ण पैदल यात्रा गरेपछि छाङरु र तिंकर पुगिन्छ । भारतको बाटोमा एक दिनमै पुगिन्छ । तिंकर र छाङ्गरुमा ११३ परिवारको बसोबास छ । तिंकर र छाङ्गरुमा पहिलो चरणको सुपरिवेक्षण मात्रै हुन सकेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।