नेकपा(एमाले)का नेता रघुवीर महासेठले उम्मेदवारी घोषणा गर्ने नेताहरूले निर्वाचनको समयसम्म उम्मेदवारी फिर्ता लिने दाबी गरेका छन् ।

मंगलबार एमालेको स्थायी कमिटी बैठकको क्रममा सञ्चारकर्मीलाई संक्षिप्त प्रतिक्रिया दिँदै उनले जुन प्रतिनिधिको बलमा उम्मेदवारी घोषणा गरिएको छ सोही प्रतिनिधिको प्रस्तावमा उम्मेदवारी फिर्ता हुने बताए । ८० प्रतिशतभन्दा बढी प्रतिनिधिहरूले सहमतिकै आधारमा नेतृत्व चयन होस् भन्ने चाहेको उनको भनाइ थियो ।

‘प्रजातान्त्रिक विधिमा पनि, प्रक्रियामा पनि, सहमति भनेको पनि ठूलो प्रक्रिया हो । हामी सहमतिकै आधारमा आउने महाधिवेशनमा नेतृत्वको चयन होस् भनेर बहुसंख्यक ८० प्रतिशतभन्दा बढी प्रतिनिधिहरू सहमतिको पक्षमा हुनुहुन्छ । जुन साथीहरूले अहिले उम्मेदवारी घोषणा गर्नुभएको छ, मलाई विश्वास छ, निर्वाचनको समयसम्म उहाँहरू आफ्नो उम्मेदवारी फिर्ता लिनुहुन्छ किनकि जुन प्रतिनिधिको भरमा उहाँहरूले उम्मेदवारी घोषणा गर्नुभएको छ । त्यही प्रतिनिधिको अनुरोधमा उहाँहरूले फिर्ता लिनुहुन्छ । हामी सबै नेतृत्वमा बस्नेहरूलाई विश्वास छ ।’

उनले एमालेको नेतृत्व चयन सहमतिमा हुँदैन कि भनेर शंका गर्ने ठाउँ नरहेको बताए । केही नेताहरूले आवेगमा आएर उम्मेदवारी घोषणा गरेको नेता महासेठको टिप्पणी छ ।