हालै अफ्रिकामा कोरोना भाइरसको नयाँ भेरिएन्ट ओमिक्रोन भेटिएपछि इजरायलले आफ्ना नागरिकलाई अफ्रिकी देशको भ्रमणमा प्रतिबन्ध लगाएको छ ।

प्राप्त समाचारहरूमा इजरायलले हाल कुनै थप प्रतिबन्धहरूको घोषणा गरेको त छैन तर हालका लागि अफ्रिकी देशहरूको भ्रमणमा आफ्ना नागरिकहरूलाई रोक लगाएको जनाएको छ ।

बिहीबार इजरायलले सातवटा अफ्रिकी देशलाई रातो सूचीमा राखेर ती देशको यात्रामा प्रतिबन्ध गरेकामा शनिबार सबै अफ्रिकी देशमा नजान आफ्ना नागरिकमाथि प्रतिबन्ध लगाएको हो ।

त्यस्तै, इजरायलले हाल करिब ५० वटा अफ्रिकी देशहरूमा रहेका आफ्ना नागरिकलाई पनि स्वदेश फर्किन भनेको छ । इजरायलले आफ्ना नागरिक ती अफ्रिकी देशमा रहेका भए कम्तीमा सात दिनभित्रमा स्वदेश फर्किन पनि भनेको छ ।

यो नयाँ भेरिएन्ट विश्वका विभिन्न देशहरूमा देखिन थालिसकेको समाचारहरू आएका छन् । उता यो भेरिएन्ट भेटिएपछि बेलायतले अहिलेको भन्दा थप कडा प्रतिबन्धहरूको घोषणा गरेको छ ।

त्यस्तै अष्ट्रेलियामा पनि अफ्रिकी देशहरूबाट हुने यात्रमा कडाइ गरिएको छ । अष्ट्रेलियाले अरु देशबाट आउने उडानहरुका साथै विशेष गरी अफ्रिकी देशको यात्रामा थप निगरानी बढाइएको जनाएको छ ।

हालै अफ्रिकामा देखिएको यो भेरिएन्ट अहिलसम्मकै सबैभन्दा बढी खतरनाक पाइएको अनुसन्धानबाट देखिएको छ । यो भेरिएन्ट देखिएपछि यसको अनुसन्धान सुरु भएको बताइएको छ ।