लुम्बिनी प्रदेश प्रधानमन्त्री कप महिला राष्ट्रिय क्रिकेट प्रतियोगिताको सेमिफाइनल नजिक पुगेको छ । 

समूह ‘ए’ अन्तर्गत फाप्ला क्रिकेट मैदानमा कर्णाली प्रदेशलाई १० विकेटले पराजित गर्दै लुम्बिनी सेमिफाइनल नजिक पुगेको हो । 

मैदान भिजेका कारण खेल ६ ओभरमा झारिएको थियो । जसमा लुम्बिनीले जम्मा १८ रनको लक्ष्य पाएको थियो । सो लक्ष्य लुम्बिनीले ३.१ ओभरमा कुनै पनि विकेट नगुमाएर पूरा गरेको हो । 

लुम्बिनीका लागि लक्ष्मी चौधरी १२ र नेरी थापा ५ रनमा अविजित रहेका हुन् । 

यसअघि कर्णालीले ६ ओभरमा ३ विकेट गुमाएर १७ रन जोडेको थियो । कर्णालीका लागि कप्तान आयुशा टन्डन र दिक्ष्या पुरीले समान ७–७ रन जोडे । 

लुम्बिनीका लागि सुस्मिता भुषालले दुई तथा नेरी थापाले एक विकेट हात पारे । 

चार टोली रहेको यस समूहमा लुम्बिनीले लगातार दोस्रो जित हात पार्दै दुई खेलबाट चार अंक जोडेको छ । 

यता आफ्नो पहिलो खेल जितेको प्रदेश- १ को दुई अंक रहेको छ ।

कर्णालीले भने लगातार दुई खेलमा पराजित भएको छ । बागमती प्रदेशले पनि पहिलो खेलमा पराजय भोगेको हो ।