नेपालगञ्जस्थित भेरी अस्पतालमा १२ घण्टाभित्र दुई कोरोना संक्रमितको मृत्यु भएको छ । जिल्ला कोभिड व्यवस्थापन केन्द्र बाँकेका स्रोत व्यक्ति तेज वलीका अनुसार अस्पतालमा उपचाररत बर्दियाका ७१ वर्षीय संक्रमित पुरुषको मृत्यु भएको १२ घण्टाभित्रै कालीकोटका १६ वर्षीय बालकको मृत्यु भएको हो ।

मधुवन नगरपालिका–६ निवासी ७१ वर्षीय पुरुषको उपचारका क्रममा मंगलबार राति साढे १० बजे मृत्यु भएको थियो । भेरी अस्पतालमा यही १० माघमा पिसिआर गर्दा उनलाई कोरोना पोजिटिभ देखिएपछि सोही दिन भर्ना गरिएको थियो । 

यस्तै, कालीकोट शुभकालिका–५ निवासी १६ वर्षीय बालकको भेरी अस्पतालमा बुधबार बिहान ११ः१५ बजे मृत्यु भएको हो । यही ४ माघमा पिसिआर गर्दा कोरोना पोजिटिभपछि भोलिपल्ट भेरी अस्पतालमा भर्ना गरिएकामा उपचारकै क्रममा उनको मृत्यु भएको जिल्ला कोभिड व्यवस्थापन केन्द्रका स्रोत व्यक्ति वलीले जानकारी दिए ।