काठमाडौं- भौतिक पूर्वाधार तथा यातायातमन्त्री रघुवीर महासेठले निर्माण व्यवसायीका जायज काममा सरकारी हस्तक्षेप नहुने प्रतिबद्धता जनाएका छन् । 

नेपाल निर्माण व्यवसायी महासंघले ११औं राष्ट्रिय निर्माण दिवसको अवसरमा आज यहाँ आयोजना गरेको प्रभातफेरी कार्यक्रममा उनले व्यवसायीका काममा सरकारी हस्तक्षेप हुन नदिने बताए । देश बनाउने जिम्मेवारी निर्माण व्यवसायीकै रहेकाे बताउँदै मन्त्री महासेठले पूर्ण शक्तिका साथ देश निर्माणमा जुट्न व्यवसायीलाई अनुरोध गरे ।

‘विगतमा व्यवसायी र सरकार दुवै पक्षबाट कमी-कमजोरी भए होेलान्, अब त्यस्ता कमी-कमजोरी सच्यााएर अघि बढ्नुको विकल्प छैन,’ मन्त्री महासेठले भने । उनले २०५२ सालदेखि विभिन्न कारणले पूरा नभएका योजनाको म्याद थप गर्ने प्रक्रिया सुरु भइसकेको जानकारीे दिए ।’

महासंघका अध्यक्ष रवि सिंहले निर्माण व्यवसायलाई स्थापित पेसा बनाउन वर्तमान नेतृत्व क्रियाशील रहेको बताए । अहिलेको सरकारको नारा ‘समृद्ध नेपाल सुखी नेपाली’लाई साकार बनाउन महासंघ प्रतिबद्ध रहेको उल्लेख गर्दै उनले निर्माणमैत्री वातावरण अहिलेको आवश्यकता भएको बताए । महासंघका उपाध्यक्ष आङदोर्जी लामा (एडी) ले भौतिक पूर्वाधारको निर्माणविना समृद्ध नेपालको परिकल्पना गर्न नसकिने बताए । महासंघका महासचिव रोशन दाहालले सरकार र व्यवसायीबीचको सहकार्यबाट मात्र निर्माण क्षेत्रको विकास हुने बताए ।