काठमाडौं– चिलिमे जलविद्युत् कम्पनीले आर्थिक वर्ष २०७४/७५ को मुनाफाबाट २५ प्रतिशत लाभांश दिने भएको छ । कम्पनीको बुधबार बसेको सञ्चालक समितिको बैठकले सो आवको सञ्चित मुनाफाबाट चुक्ता पुँजीको पाँच प्रतिशत नगद लाभांश र २० प्रतिशत सेयर लाभांश दिने निर्णय गरेको हो । 

कम्पनीले अघिल्लो वर्ष १५ प्रतिशत सेयर लाभांश र १० प्रतिशत नगद लाभांश दिएको थियो । सञ्चालक समितिको उक्त प्रस्ताव आगामी वार्षिक साधारणसभाबाट पारित भएपछि वितरण गर्ने कम्पनीले जनाएको छ । कम्पनीले उक्त जानकारी नेपाल स्टक एक्सचेन्जलाई गराएको छ । 

कम्पनीले रसुवामा २२ मेगावाट क्षमताको चिलिमे जलविद्युत् आयोजना सञ्चालन गरिरहेको छ । यस्तै, सोही कम्पनीका सहायक कम्पनीले अन्य चार आयोजना निर्माण गरिरहेको छन् । ती आयोजनामा माथिल्लो साञ्जेन, रसुवागढी र मध्यभोटेकोशी रहेका छन् । 

यस्तै, नेपाल स्टक एक्सचेञ्जले आज मञ्जुश्री फाइनान्स लिमिटेडको कारोबारमा रोक लगाएको छ । केही विषयमा सोधपुछ गर्नुपर्ने भएकाले कारोबारमा रोक लगाइएको स्टकले जनाएको छ । यस्तै, स्टकले आजै कर्पोरेट डेभलपमेन्ट बैंकको लिमिटेडको कारोबार खुला गरेको छ । 

यस्तै, स्टकमा आज सोल्टी होटल लिमिटेडको सेयर मूल्य समायोजन भएको छ । कम्पनीले १० प्रतिशत सेयर लाभांश दिने घोषणा गरेसँगै सेयर मूल्य २ सय १२ हुने गरी समायोजन गरेको हो । कम्पनीको औसत आधार मूल्य २ सय ५५ रहेको छ ।