नेपालमा उच्च शिक्षाका लागि अष्ट्रेलिया प्रमोट गरिरहेका शैक्षिक परामर्श संस्थाहरुको संगठन नेप्लिज एशोसियसन अफ अष्ट्रेलियन एजुकेसन रिप्रिजेन्टेटिभ्स (नाएर)ले आगामि दुई वर्षका लागि नयाँ कार्यसमिति छानेको छ ।
शुक्रबार काठमाडौंमा भएको नाएरको वार्षिक साधरण सभाले नयाँ कार्यसमिति छानेको हो ।
नाएरले जनाएअनुसार अबको दुई वर्षे कार्यकालका लागि प्रेम पाण्डे अध्यक्ष छानिएका छन् । त्यस्तै, उपाध्यक्षमा उद्धव बहादुर खड्का छानिएका छन् । खड्का यसअघि नाएरका महासचिव थिए ।
अबको कार्यकालका लागि थरेन्द्रराज अधिकारी महासचिव चयन भएका छन् । एन्ड्र्यु पौडेल सचिव छानिएका छन् भने शालिकराम भण्डारी कोषाध्यक्ष छानिएका छन् । भोजराज पाण्डे र बुद्ध शाक्य नाएरको कार्यसमितिका सदस्य भएका छन् ।
नाएरको स्थापना अष्ट्रेलियन हाइ कमिसन र नेपालस्थित अष्ट्रेलियन दूतावासको सहकार्यमा सन् २००७ मा भएको थियो । १४ औं साधरण सभामा निवर्तनमान अध्यक्ष विज्ञान श्रेष्ठले आफ्नो कार्यकालमा भएका प्रगति विवरण सुनाउनुका साथै आगामि कार्यसमितिलाई शुभकामना दिएका थिए ।
नेपालमा भएका अष्ट्रेलियन कलेज तथा विश्वविद्यालयका आधिकारिक शैक्षिक परामर्शदाता संस्थाहरुको छाता संगठन नाएरले अष्ट्रेलियन दूतावास, अष्ट्रेलियाबाट नेपाल फर्किएकाहरुको संगठन आनालगायतसँग सहकार्य गर्दै आएको छ ।
अब अष्ट्रेलियामा उच्च शिक्षाका लागि काम गरिरहेका संस्थाहरुको आधिकारिक संगठनका रुपमा नाएरको विकास गरिने नयाँ कार्यसमितिले जनाएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।