कैलालीको धनगढी उपमहानगरपालिकाको नगर प्रमुखको लागि स्वतन्त्र उम्मेदवारी दिएका गोपाल हमालले चुनाव जिते एक रुपैयाँ पनि भ्रष्टाचार नगर्ने भन्दै मन्दिरमा कसम खाएका छन् ।
बिहीबार विहान धनगढी–१६ मा रहेको प्रसिद्ध बेहडाबाबा मन्दिरमा गएर आफूले नगर प्रमुखमा जिते एक रुपैयाँ पनि भ्रष्टाचार नगर्ने भन्दै कसम खाएका हुन् ।
‘करोडौं भ्रष्टाचार गर्छ’ भनेर अफवाह फैलाएपछि आफूले आस्था राख्ने मन्दिरमा आएर सार्वजनिकरूपमा एक रुपैयाँ पनि भ्रष्टाचार नगर्ने कसम (क्रिया) खाएको हमालको भनाइ छ ।
उनले यसअघि नगर प्रमुखमा जिते नगरपालिकाबाट कुनै पनि सेवा सुविधा नलिने घोषणा गरिसकेका छन् । हमाल यसअघि ०७४ को स्थानीय चुनावमा पनि स्वतन्त्रबाट धनगढीको नगर प्रमुखमा उम्मेदवारी दिएका थिए ।
सो चुनावमा उनी २ हजार ७ मतले पराजित भएका थिए । अघिल्लो निर्वाचनमा दोस्रो भएका हमाललाई यसपालि गठबन्धन उम्मेदवारको निकटतम प्रतिद्वन्द्वीकै रूपमा हेरिएको छ । गठबन्धन (कांग्रेस, माओवादी र समाजवादी) बाट नृपबहादुर वड नै मेयरमा उठेका छन् । त्यस्तै, नेकपा एमालेबाट रणबहादुर चन्द मेयरका लागि चुनावी मैदानमा छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।