स्थानीय तह निर्वाचनको तीन दिन मात्र बाँकी रहेको छ । मंगलबार मध्यरातिदेखि मौन अवधि सुरु हुँदै छ । 

मंगलबार चुनावी प्रचारप्रसारको अन्तिम दिन जनकपुरधाममा नगरप्रमुख पदका उम्मेदवारहरु आ–आफ्नो सम्पूर्ण शक्ति खर्चेका छन् । चुनावी प्रचारप्रसारको अन्तिम दिन आज उम्मेदवारहरुले आफ्नो सम्पूर्ण शक्तिको प्रयोग प्रचारप्रसारमै केन्द्रित गरेका थिए ।

मंगलबार दलहरुले बाजागाजाका साथ भव्य र्याली निकालेका थिए । नाचगानका साथ निस्केको र्यालीको माध्यमले उम्मेदवारहरुले मतदाताहरुलाई रिझाउने प्रयास गरेका थिए । दलहरुको र्यालीमा हजारौँको संख्यामा समर्थकहरुको सहभागिता रहेको थियो ।

त्यसैक्रममा स्वतन्त्र उम्मेदवारहरु बलराम महतो, जानकी राम साह, मनोज साह, नेकपा एमालेका उम्मेदवार शिवशंकर साह हीरालगायतको शक्ति प्रदर्शनमा उल्लेख्य संख्यामा समर्थकहरुको भीड देखिएको थियो । आज दिनभर नगरको सम्पूर्ण भाग प्रचारप्रसारमय बनेको थियो । नगरका हरेक उम्मेदवारले दिनभर शक्ति प्रदर्शनमै केन्द्रित थिए । 

सबैले आ–आफ्ना समर्थकसहित नगरभरि परिक्रमा गरेका थिए । प्रायः हरेक उम्मेदवारले जनकपुरधामवासीलाई निःस्वार्थ भावले काम गर्ने प्रतिबद्धता व्यक्त गरिरहेका थिए ।