नेपाली कांग्रेसका नेता प्रदीप पौडेलले बलात्कारसम्बन्धी मुद्दामा लगाइएको हदम्याद हटाउनुपर्नेमा जोड दिएका छन् । उनले हदम्यादका कारण अपराधीले सहजै उन्मुक्ति पाउने र पीडित कमजोर हुने अवस्था रहेको पनि बताए ।  

‘मुलुकी अपराध संहिता(२०७४ र बालबालिकासम्बन्धी ऐनमा बलात्कार कसुरबारे उजुरीको हदम्याद तोकिएको छ, त्यहीकारण पीडितहरू प्रताडनाबाट गुज्रने गरेको पाइएको छ । बलात्कारका पुराना घटनाको उजुरी नलिँदा पीडितले हरेस खाने तथा अपराधीले सहजै उन्मुक्ति पाउने अवस्था छ । यस्ता अपराधमा समय सीमाको हदम्याद तोकिनुहुन्नँ,’ पौडेलले उनले सामाजिक सञ्जालमा लेखेका छन् ।   

बिहीबार मात्रै आठ वर्षअघि भएको एक सुन्दरी प्रतियोगिताकी एक प्रतिस्पर्धीले आफूमाथि आयोजकले बलात्कार र यौन शोषण गरेको घटना सार्वजनिक गरेकी थिइन् । हदम्यादका कारण आफूले न्याय पाउने अवस्था नरहेको ती युवतीको गुनासो छ । 

यसैबीच, अधिकारकर्मी र युवाहरूले शुक्रबार बिहान बलात्कारसम्बन्धी मुद्दामा रहेको हदम्यादको व्यवस्था हटाउन माग गर्दै बालुवाटारमा प्रदर्शनसमेत गरेका छन् ।