दुई वर्षअघि अन्तरजातीय प्रेम गरेको कारण ज्यान गुमाएका नवराज विकसहित ६ जनाको सम्झनामा काठमाडौंमा प्रतिरोध दिवस-२०७७ मनाइएको छ । मंगलबार काठमाडौंस्थित माइतीघर मण्डलमा उनीहरूको सम्झनामा जात व्यवस्थाविरुद्ध प्रतिरोध दिवस-२०७७ मनाइएको हो ।

सहभागीहरूले 'थोत्रो स्थिति फालौँ, आउनुहोस् आजै थालौँ', 'पितृसत्ता फालौँ, आउनुहोस् आजै थालौँ', 'धर्मको आड लिएर, जातको सत्ता बनायौँ, रगतकै सत्ता पालेर प्रेमको घाँटी समायौँ', 'जुन थितिमा जात छ, मान्छे त्यहाँ दास छ'लगायतका नारासहित प्रदर्शन गरेका थिए । जात व्यवस्था उन्मूलन मोर्चाले उनीहरूको न्यायको लागि प्रतिरोध दिवस मनाइएको जनाएको छ ।

दुई वर्षअघि रूकुम पश्चिम चौरजहारी नगरपालिका-८ मा आफ्नी प्रेमिकाका घरमा गएका बेला नवराजसहित उनका ६ जना साथीको गाउँलेको कुटपिटबाट मृत्यु भएको थियो । सो घटनामा नवराजसहित, लोकेन्द्र सुनार, सन्दिप विश्वकर्मा, गणेश बुढा, टीकाराम सुनार र गोविन्द शाहीको ज्यान गएको थियो ।