नेकपा एमालेका उपाध्यक्ष विष्णु पौडेलले अब गठबन्धनको ओरालो यात्रा सुरु हुने बताएका छन् । उनले बुधबार आगामी निर्वाचनमा गठबन्धनको पटाक्षेप हुने उनले बताएका हुन् । आगामी निर्वाचन पछि एमालेको नेतृत्वमा सरकार बन्ने कुरालाई कसैले रोक्न नसक्ने उनले दाबी गरे । 

‘यो गठबन्धनको पटाक्षेप आउने निर्वाचनमा हुनेवाला छ । गठबन्धनले जे गेन गर्न सक्ने हो, त्यो गरिसक्यो । अब यसको ओरालो यात्रा सुरु हुन्छ । र आउने निर्वाचनमा गठबन्धनको पटाक्षेप हुन्छ । म तपाईंहरूसँग फेरि दाबी गरेर भन्छु, आउने निर्वाचनमा नेकपा(एमाले)को नेतृत्वमा सरकार बन्ने कुरा कसैले रोक्न सक्दैन' उनले भने । 

संसदको ठूलो पार्टी हुने एमालेको हैसियतलाई कसैले रोक्न नसक्ने उनले दाबी गरे । स्थानीय तहको निर्वाचनमा एकखालको प्रयोग भइसकेको बताउँदै उनले सारा दल एकातिर हुँदा पनि एमालेको श्रेष्ठतालाई कसैले खण्डित गर्न नसक्ने तर्क गरे । 

'निर्वाचन परिणामका हिसाबले, निर्वाचित भएका पदाधिकारी सदस्य संख्याको हिसाबले एमाले दोस्रो भएको होला, जनमतको हिसाबले, संगठनात्मक शक्तिको हिसाबले एमालेलाई चुनौती दिने तागत कसैसँग छैन । एमालेसँग एक्लै प्रतिस्पर्धा गर्ने हैसियत नै कसैसँग छैन । यो त अहिले पनि देखिइसकेको छ’ उनले भने ।

उनले सरकारले ल्याएको नीति तथा कार्यक्रमले मुलुकको आर्थिक संकटका कारणलाई चिनेर त्यसको निराकरण गर्नेगरी ल्याउनुपर्नेमा त्यसो हुन नसकेको बताए ।