मधेस प्रदेश सरकारको बजेट पारित भएको छ । प्रदेश सरकारले प्रदेश सभामा प्रस्तुत गरेको आर्थिक वर्ष ०७९/८० को बजेट आइतबारको बैठकले पारित गरेको हो ।
१ असारमा ०७९/८० का लागि मधेस प्रदेश सरकारले ४६ अर्ब ८८ करोड ९ लाख ४६ हजारको बजेट ल्याएको थियो । अर्थमन्त्री शैलेन्द्र प्रसाद साहले प्रस्तुत गरेको वार्षिक आय–व्यय विवरणमा चालूतर्फ २१ अर्ब ७६ करोड ६७ लाख ९५ हजार अर्थात् ४६.४४ प्रतिशत रकम विनियोजन गरिएको थियो ।
यसै गरी पुँजीगततर्फ २५ अर्ब ८२ करोड २० लाख ८० हजार अर्थात् ५३.२१ प्रतिशत, वित्तीय व्यवस्थातर्फ १६ करोड २४ लाख ५६ हजार २ सय अर्थात् ०.३५ प्रतिशत विनियोजन गरिएको छ ।
आगामी आर्थिक वर्षका लागि अनुमान गरिएको खर्च व्यहोर्ने स्रोतमध्ये आन्तरिक स्रोतको राजस्वबाट ४ अर्ब १८ करोड ९३ लाख ७५ हजार, कोषहरूमा रहेको सञ्चित रकम ३८ करोड, नेपाल सरकारबाट राजश्व बाँडफाँड बापत प्राप्त ११ अर्ब ६१ करोड ५८ लाख र समानीकरण बापत प्राप्त अनुदान ७ अर्ब ८१ करोड ५८ लाख रहेको मन्त्री साहले बताए ।
चालू आर्थिक वर्षको विनियोजनबाट बचत हुने नगद मौज्दात ९ अर्ब ६६ करोड, विशेष अनुदान ४९ करोड, समपूरक अनुदान ७८ करोड, संघीय सरकारबाट सशर्त योजनाको लागि प्राप्त अनुदान १० अर्ब ६ करोड ५१ लाख र युनिसेफबाट प्राप्त हुने अनुदान ४ करोड ३३ लाख ४७ हजार गरी जम्मा ४५ अर्ब ४ करोड ९९ लाख २८ हजार बेहोर्दा १ अर्ब ८२ करोड १० लाख १८ हजार २ सय न्यून हुने देखिन्छ । सो न्यून पूर्ति गर्न आगामी आर्थिक वर्षमा आन्तरिक ऋण परिचालन गरिनेछ ।
यसअघि मधेस प्रदेश सरकारले आर्थिक वर्ष २०७८/०७९ मा ३३ अर्ब ७९ करोड १४ लाख ३० हजारको बजेट ल्याएको थियो । जसमा चालूतर्फ १५ अर्ब ६३ करोड ३३ लाख ४७ हजार अर्थात् ४६.२६ प्रतिशत रकम विनियोजन गरिएको थियो । जसमा पुँजीगततर्फ १८ अर्ब ५ करोड ८० लाख ८३ हजार अर्थात् ५३.४४ प्रतिशत र वित्तीय व्यवस्थातर्फ १० करोड अर्थात् ०.३० प्रतिशत विनियोजन गरिएको थियो ।
बैठकमा मधेस प्रदेशका मुख्यमन्त्री लालबाबु राउतले प्रदेश सभामा बजेटका सम्बन्धमा उठेका प्रश्नहरूको जवाफ दिँदै मधेस प्रदेशको विकासका लागि योजना निर्माण गरिएको र सोहीअनुसार बजेट ल्याइएको बताए ।
यस्तै, अर्थमन्त्री साहले प्रदेशका जनताको जीवनस्तरमा सुधार ल्याउँदै विकासमा योगदान पुर्याउने गरी बजेट ल्याइएको बताए । प्रदेश सभाको बैठकमा अर्थमन्त्री साहले सदनमा पेस गरेको आर्थिक विधेयक २०७९ तथा कर एवम् गैर कर राजश्व लगाउने र उठाउने सम्बन्धमा व्यवस्था गर्न बनेको विधेयक सर्वसम्मत पारित भएको हो । यसअघि शनिबार नै प्रदेश सभाबाट विनियोजन विधेयक पारित भएको थियो ।
बजेटमाथिको छलफलको क्रममा प्रदेश सभा सदस्यहरूले उठाएका प्रश्नहरूको जवाफ अर्थमन्त्री साहले सदनमा दिएपछि बजेट पास गरिएको हो । बजेट पारित भएसँगै मधेस प्रदेश सभाको बैठक अनिश्चित कालका लागि स्थगित भएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
