साउन महिना सुरु भएसँगै बजारमा हरियो पोतो किन्न र मेहन्दी लगाउनेको चहलपहल सुरु भएको छ । विशेष गरी अविवाहित किशोरीमा पनि साउन महिनामा हरियो र पहेँलो चुरा तथा हातमा मेहन्दी लगाउने चलन बढ्दै गएको हो । 

साउन महिनामा चुरा र मेहन्दीको माग उच्च हुने व्यवसायी बताउँछन् । महिलाले हरियो चुरालगायत कपडा लगाएर प्रकृतिसँग नजिक भएको मानिने जनविश्वास बढ्दै गएको छ । 

साउन महिनामा भगवान् शिवको विशेष पूजार्चना गरिने भएकाले साउनलाई शिवजीको महिना पनि भन्ने गरिन्छ । साउनमा विवाहित तथा अविवाहित महिलाले विभिन्न मनोकांक्षा राखेर व्रत बस्ने गर्दछन् ।