झापामा  एउटै रुखमा तीनजना किशोरी झुन्डिएको अवस्थामा फेला परेका छन् । जिल्लाको कचनकवल गाउँपालिका- ५ स्थित सुनकोसी चिया बगानमा रहेको बयरको रुखमा झुन्डिएको अवस्थामा  भेटिएको प्रहरीले जनाएको छ ।

त्यसरी सामूहिक आत्महत्या गर्नेहरूमा कचनकवल- ५ बस्ने पंचम गणेशकी १६ वर्षीया छोरी करिना, पुवालु गणेशकी १७ वर्षीया छोरी अञ्जली र बिरबल गणेशकी १६ वर्षीया छोरी कल्पना रहेका छन् । 

स्थानीयका अनुसार उनीहरू तीनैजना शनिबार दिउँसोदेखि घरबाट बेपत्ता भएका थिए । उनीहरू आइतबार बिहान सामूहिक झुन्डिएको अवस्थामा स्थानीयले फेला पारेपछि प्रहरीलाई खबर गरेका थिए । अहिले प्रहरी घटनास्थल पुगेको छ । 

तीनैजना किशोरी चिया बगानमा काम गर्ने गरेका थिए । सामूहिक आत्महत्याको कारण भने खुलेको छैन ।