अफगानिस्तानको दक्षिणी जाबुल प्रान्तमा विगतको युद्धबाट बाँकी रहेका विस्फोटक पदार्थ विस्फोट हुँदा दुई बालबालिकाको मृत्यु भएको छ । साथै, अन्य १० जना घाइते भएका स्थानीय अधिकारीले बताएका छन् ।

‘मंगलबार दिउँसो मिजान जिल्लामा बालबालिकाको एउटा समूहले खेलौना जस्तो वस्तु फेला पारेको थियो र खेल्ने क्रममा त्यो विस्फोट हुँदा दुई जनाको घटनास्थलमै मृत्यु भएको छ भने अन्य १० जना घाइते भएका छन्,’ एक अधिकारीले सिन्ह्वालाई नाम नभन्ने शर्तमा बताएका छन् ।

यसैबीच जनस्वास्थ्य विभागका प्रान्तीय प्रमुख अब्दुल हाकिम हाकिमीले दुई जनाको शव र १० जना घाइते बालबालिकालाई अस्पताल लगिएको पुष्टि गरेका छन् । पछिल्लो पाँच दिनमा दक्षिणी क्षेत्रमा घटेको यो दोस्रो घटना हो ।

यसैगरी छिमेकी हेलमान्डको प्रान्तीय राजधानी लस्करगाहमा शुक्रबार यस्तै घटनामा एक बालकको ज्यान गएको छ भने तीन जना घाइते भएका छन् ।