नेपाली राष्ट्रिय टोलीका कप्तान तथा गोलरक्षक किरण चेम्जोङले माल्दिभ्सको धिवेही प्रिमियर लिगको उपाधि जितेको खुसियाली मनाउने क्रममा प्रेमिका कञ्चन निरौलालाई विवाह प्रस्ताव राखेका छन् ।
लिगको उत्कृष्ट गोलरक्षक समेत रहेका किरणले टोली उपाधि उचालेर खुसियाली मनाइरहँदा सबैको सामुन्ने प्रस्ताव राखेका थिए । उनले आफ्नो सामाजिक सञ्जालमार्फत उक्त क्षणको भिडियो पनि सार्वजनिक गरेका छन् । किरण र कञ्चन लामो समयदेखि प्रेममा थिए । पेशाले विमान परिचारिका रहेकी कञ्चनसँगै किरणकी आमा पनि माल्दिभ्स पुगेकी थिइन् ।
किरणले आफ्नो टोली माजिया स्पोर्टस एण्ड रिक्रियसनलाई लगातार तेस्रो लिग उपाधि दिलाउन उच्च प्रदर्शन गरेका थिए । माल्दिभ्सको शीर्ष लिग धिवेही प्रिमियर लिगमा किरणले दोस्रोपटक उत्कृष्ट गोलरक्षकको अवार्ड जितेका हुन् ।
यसअघि किरणले सन् २०१८ मा टिसी स्पोर्ट्सबाट उपाधिसँगै उत्कृष्ट गोलरक्षकको अवार्ड जितेका थिए । माल्दिभ्समा किरणले माजियाबाट पहिलो तथा व्यक्तिगत रुपमा दोस्रो लिग उपाधि जिते ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
