घरेलु टोली आयरल्याण्डविरुद्धको टी–२० सिरिजअन्तर्गत पहिलो खेलमा दक्षिण अफ्रिका विजयी भएको छ । ऊ गएराति सम्पन्न खेलमा २१ रनले विजयी भएको हो ।

२१२ रनको लक्ष्य पछ्याएको आयरल्याण्डले २० ओभर नै ब्याटिङ गरे पनि नौ विकेट गुमाउँदै १९० रन मात्र बनाउन सक्यो । लोर्कन टकरले ७८ रनको उत्कृष्ट पारी खेले पनि घरेलु टोलीलाई जित दिलाउन सकेनन् । उनले ३८ बलमा सात चौका र पाँच छक्का प्रहार गरे ।

जर्ज डकरेलले ४३, पउल स्टर्लिङले १८, कप्तान एन्डी बलबर्नीले १४ र एन्डी म्याकब्राइनले १० रन जोडे । दक्षिण अफ्रिकाका लागि केशव महाराज, वेन पार्नेल, ताबरेज शाम्सीले दुई/दुई तथा लुङ्गी एनगिडी र ड्वेन प्रिटोरियसले एक/एक विकेट हात पारे ।

त्यसअघि ब्रिस्तोलस्थित काउन्टी मैदानमा टस जितेर ब्याटिङ रोजेको दक्षिण अफ्रिकाले निर्धारित २० ओभरमा पाँच विकेट गुमाउँदै २११ रन बनायो । उसका लागि रीजा हेन्ड्रिक्स र एडेन मार्करम अर्धशतकीय पारी खेले । ७८ रन बनाएका हेन्ड्रिक्सले ५३ बलमा १० चाैका र एक छक्का प्रहार गरे ।

मार्करमले २७ बलमा पाँच  छक्का र दुई  चौकासहित ५६ रन जोडे । ट्रिस्टन स्टब्सले २४, ड्वेन प्रिटोरियसले अविजित २१ र रस्सी भान डेर डुसेनले १० रनको योगदान गरे ।

आयरल्याण्डका लागि ग्यारेथ डेलानीले दुई तथा जोस लिटल र एन्डी म्याकब्राइनले एक/एक विकेट लिए । यो जितसँगै दक्षिण अफ्रिकाले दुई खेलको सिरिजमा १–० को अग्रता लिएको छ ।

दोस्रो तथा अन्तिम खेल भोलि हुनेछ ।