तिलगंगा आँखा अस्पतालका वरिष्ठ नेत्ररोग विशेषज्ञ डा. सन्दुक रुइतसहित हेटौंडा सामुदायिक आँखा अस्पतालको प्राविधिक टोलीले ३ सय ६९ जना मोतिविन्दुका बिरामीको निःशुल्क शल्यक्रिया गरेको छ ।

तेज कोहली एण्ड रुइत फाउण्डेसनको सहयोगमा हेटौँडा सामुदायिक आँखा अस्पतालले निःशुल्क आँखा जाँच एवं मोतिविन्दुको शल्यक्रिया कार्यक्रम आयोजना गरेको हो । मकवानपुरको भिमफेदी, मनहरी, राईगाउँ बाराको फत्तेपुर, निजगढ, कोहल्वी, पर्साको कटैया, रौतहटको गजुरा, सिन्धुलीको पिपलमाढी र चनेश्वरमा निःशुल्क शिविर आयोजना गरी २ हजार आठ सय २२ जना बिरामीको आँखा जाँच गर्दा ४ सय ९४ जना बिरामीमा मोतिबिन्दु पाइएको थियो ।

तेज कोहली एण्ड रुइत फाउण्डेसनबाट यस वर्ष हेटौंडा सामुदायिक आँखा अस्पताललाई ५ सय जनाको मोतिविन्दुको शल्यक्रिया गर्न खर्च सहयोग प्राप्त भएको हेटौँडा सामुदायिक आँखा अस्पतालले जानकारी दिएको छ ।