साउदी अरबमा एक नेपालीलाई मृत्युदण्ड दिइएको छ । मृत्युदण्डको सजाय पाएर १५ वर्षदेखि जेल जीवन बिताइरहेका उदयपुरका विवेक दाहाललाई मृत्युदण्ड दिइएको हो ।

मृत्युदण्डपछि उनको शव परिवारलाई नदिएर साउदीमा जमिनमा गाडिएको छ । रियादस्थित नेपाली दूतावासकाअनुसार जुवेल जेल प्रशासनले कार्तिक ६ गते दाहाललाई मृत्युदण्डको सजाय कार्यान्वयन गरेको हो । 

साउदीका लागि नेपाली राजदूत नवराज सुवेदीले दूतावासलाई जानकारी नदिएर मृत्युदण्डको सजाय कार्यान्वयनमा आएको बताए ।

‘दाहाललाई माफी दिइन्छ भनेर हामी ढुक्क थियौं । तर, एक्कासि मृत्युदण्डको सजाय कार्यान्वयन गरिएको खबर आयो । जेल प्रशासनले ४८ घण्टापछि मात्रै सूचना दियो,’ सुवेदीले भने, ‘यो हाम्रो लागि निकै दुर्भाग्यपूर्ण हो ।’

विवेक दाहालले २ फेब्रुअरी सन् २००७ आफन्त राजेन्द्र विष्टको हत्या गरेका थिए । अदालतले विष्टको हत्या गरेको ठहर गर्दै मृत्युदण्डको सजाय सुनाएको थियो ।