ललितपुर क्षेत्र नम्बर ३ की उम्मेदवार डा. तोसिमा कार्कीको उम्मेदवारी कायम भएकाे छ । सर्वोच्च अदालतले उनकाे उम्मेदवारीसम्बन्धी विवादमा यसअघिको अन्तरिम आदेशलाई निरन्तरता दिएको छ।

राष्ट्रिय स्वतन्त्र पार्टीबाट उम्मेदवारी दिएकी कार्की मेडिकल काउन्सिलको निर्वाचित सदस्य पदमा रहेको र सो लाभको पद रहेको दाबी गर्दै आयोगले उम्मेदवारी खारेज गरिदिएको थियो । यसविरुद्ध तोसिमाले रिट दायर गरेकामा न्यायाधीश कुमार चुडालको एकल इजलासले अन्तरिम आदेशमार्फत यथावत् राखेको थियो ।  

निर्वाचन आयोगले अदालतको आदेशविरुद्ध भ्याकेट निवेदन लिएर गएकामा अदालतले यसअघिकै अन्तरिम आदेशलाई निरन्तरता दिने आदेश दिएको हो ।

सोमबार न्यायाधीशद्वय ईश्वरप्रसाद खतिवडा र तिलप्रसाद श्रेष्ठको संयुक्त इजलासमा यसकाे सुनुवाइ भएको हो ।​