पोखरामा रहेको फेवातालमा सोमबारबाट डुंगा सञ्चालनमा आएको छ । दोस्रो लहरको कोरोना भाइरस सङ्क्रमण रोकथामका लागि लागू गरिएको निषेधाज्ञाका कारण गत वैशाख १४ गतेदेखि बन्द भएको डुंगा व्यवसाय सोमबारदेखि सञ्चालनमा आएको हो । 

डुंगा सञ्चालन गर्दा भीडभाड हुन नदिन २० फुटे डुंगामा चार र १८ फुटेमा तीनजना राखेर सञ्चालन गरिएको छ । यसअघि एउटै डुंगामा आठ–नौ जनासम्म राख्ने गरिएको थियो । 

तालमा डुङ्गा सञ्चालन भए पनि प्रसिद्ध तालबाराही मन्दिर भने खुलेको छैन । मन्दिरमा दैनिक साँझमा गरिने आरतीसमेत अहिले बन्द छ । 

फेवातालमा ७६४ डुंगा रहेकामा बाराहीघाटमा मात्र ३०० छन् । निषेधाज्ञा जारी रहेको र पर्यटन व्यवसाय अहिले पनि ठप्प रहेकाले पर्यटक आवागमन नभएकाले क्यु प्रणालीमा थोरै मात्रामा डुंगा सञ्चालनमा ल्याइएको छ ।