सडक डिभिजन कार्यालय बैतडीमा जागिर खाने एक कर्मचारी बझाङमा ठेक्कापट्टा गरेको विषयमा समाचार प्रकाशन भएपछि उनलाई स्पष्टीकरण सोधिएको छ । विधि विधान, नियम, कानुनको ठाडो उलङ्घन गर्दै पेटी ठेकेदार बनेका सडक डिभिजन कार्यालयका कर्मचारी नरेन्द्र जोशीलाई सडक डिभिजन कार्यालय बैतडीले स्पष्टीकरण सोधेको हो ।
सडक डिभिजन कार्यालय बैतडीका सिनियर डिभिजन इन्जिनियर रमेश चौधरीले फरकधारसँग कुरा गर्दै जोशीलाई स्पष्टीकरण सोधिएको बताए । कर्मचारी जोशीलाई ७ दिनभित्र स्पष्टीकरण पेस गर्न आदेश दिएको सिनियर डिभिजन इन्जिनियर चौधरीले बताए । उनले भने, ‘हामीले स्पष्टीकरण सोधेका छौँ । उनलाई स्पष्टीकरण दिनका लागि ७ दिनको समय दिएका छौँ । उनको जवाफ कस्तो आउँछ सोही अनुसार अगाडि बढ्छौँ ।’
छबिसपाथिभेरा गाउँपालिकाले झण्डै १२ करोडमा अस्पताल भवन निर्माण गरीरहेको छ । उक्त अस्पताल निर्माण गर्ने ठेक्का जागृति निर्माण सेवाले पाएको छ । जागृति निर्माण सेवाले निर्माण गरिरहेको अस्पतालको पेटी ठेकेदार सडक डिभिजन कार्यालय बैतडीका सुपरभाइजर नरेन्द्र जोशी बनेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
