भरतपुर– चितवन जिल्ला अदालतमा टिभी कार्यक्रम प्रस्तोता रवि लामिछानेसहित अस्मिता भनिने रुकु कार्की, युवराज कँडेलको बयान सुरु भएको छ । अदालतका श्रेष्तेदार रुद्रमणि गिरीका अनुसार जिल्ला न्यायाधीश हेमन्त रावलको इजलासमा यो बयान सुरु भएको हो । 

जिल्ला सरकारी वकिल कार्यालय चितवनले चाहिँ यी तीनविरुद्ध जिल्ला अदालत चितवनमा मुद्दा दर्ता गरेको छ । तीनैजना विरुद्ध पाँच वर्ष कैद तथा ५० हजार जरिवाना माग गरिएको छ ।

उनीहरु पत्रकार शालिकराम पुडासैनीलाई आत्महत्या गर्न दुरुत्साहन गरेको आरोपमा पक्राउ परेका हुन् । यसअघि तीनैजनालाई जिल्ला अदालतले छानबिनका लागि दुई पटक पाँच दिनको म्याद थपेको थियो । 

जिल्ला प्रहरी कार्यालयले गरेको छानबिनपछि पर्याप्त कारण भेटिएको भन्दै उनीहरुविरुद्ध मुद्दा चलाउने तयारी गरिएको हो । 

योसँगै अब यी तीनविरुद्ध थुनछेकको बयान लिइनेछ । बयानपश्चान उनीहरुलाई थुनामै राखेर मुद्दा अगाडि बढाउने वा धरौटी माग्ने वा साधारण तारेखमा छोड्ने भन्नेबारे बहस हुन्छ ।

शालिक पुडासैनीको आत्महत्यामा दुरुत्साहन गरेको आरोप प्रमाणित भएमा रवि लामिछानेसहित तीनै जनालाई पाँच वर्षको जेल सजाय र ५० हजार जरिवाना हुनेछ ।